5.
ende meer-moghentheyt kan wtghesloten werden. Want ghelijch een vier lichterlaeye brandende, nochtans de schouwe doet roocken, alsoo oock dese pesten voeghen haer inde suyverste meyninghen, ende als Quaet-raden de me-ghesellen de beste instellinghen bederven. En hoe wel sy altemets in Coninghen en Princen oordeelen geen plaetse en vinden, meerenmael nochtans der Regenten, ende Hooftmannen begheerten onsteecken. Hier wt sien wy comen dat d’Oorloghen rechtveerdelijck tegens de quaet willighe aenghenomen, seer dickwils schandelijck worden ghevoert, ende seer schadelijck gheeyndicht. De eyghen liefde dan, ende bate treckt een yder om te Oorloghen, nae de oude ghewoonte ende misbruyck, by wijlen rechtveerdich, ende wettelijck, by wijlen onrechtelijc, selden suyuer sonder besmettinghe van boosheyt, ende arch-listicheyt.
Dese oorsaecken, om datse met meer andere vereenicht ende versterckt zijn, hoe zy machtigher, hoe zy oock qualijcker zijn om te beletten. Welck is toch dese oorsaecke die alle dit quaet versamelt, ende oprockent, deur de welcke de meer-resten boven schreve medewercken, iae tot het laeste bederf zijn handthoudende? Ick salt segghen. O Coninghen, o Princen, dat niemant dan zijn doot naeckende en soude derren segghen, Het is V.L. onbedachtheyt, onwetenheyt, ende vervloeckte slappicheyt inde dinghen daer het welvaren des Landts aenhanght. Vergevet my want ghy een Raetgever hoort spreecken, en geenen vleyer de beste Raedts-Heeren beiaerich zijnde naken haer graff oft zijn nu al ghestorven. Ende welck is dese onwetenheyt der Coninghen? zy voeren Oorloghen, meynen haer goet weder te nemen, t’onrecht te wreecken, de Bondt genoten voor te staen, den Godts dienst beschermen, maer een ander opset hebben inden sin die haer tot desen Crijch opgerockent hebben, een anderen uytganck zy verwachten, te weten, dat de Coninghen van haer rijck ende Overheden ontbloot zijnde, zylieden den staet der regieringhen mochten veranderen, als Knechten van Coninghen, over haer meesters heerschen, iae dat den laesten door een bloedige vleesch-banck, beyde de partijen gheswackt zijnde, geheel Duytslandt onder het swaer iock ende slavernije der Turcken ghebracht werde.
