VVt VVeenen den 21. April. 1621.
DIe vrede met Hongaren is wel ghesloten, doch wil Betlehem met die restitutie tot in Julio te rugh houden. Oock heeftmen van Constantinopelen tijdinghe, dat Betlehem op de Turcksche hulpe seer hert aen staet, maer die nieuwe Bassa, dewelcke tot Ofen aenghecomen is, soude bevel hebben, den practicanten gheen ghehoor te gheven, maer den vrede die voor desen ghesloten is, vast te houden, ondertusschen heeft de Setschi Gheorgh, welck een vande voornaemste Rebellen is gheweest, int secreet by Keyserlijcke Majesteyt Pardoen verkreeghen, ende daer op die Honghersche Croone dewelcke tot Altensolt is bewaert gheworden, bekomen, ende met andere Heeren ende Spanschappen dewelcke sich oock van Betlehem hebben gheabsenteert, Fileck, Wesbrin, ende andere Berghstantsche Frontier Huysen ingenomen, ende die besettinghe daerinne doodt gheslaghen, begheert hulpe, waer over de Grave van Bucquoy daer naer heen trecken sal, ende presenteert sich de Setschi, dat hy Betlehem wil levendich of doodt leveren, ende die resterende Rebellen tot ghehoorsaemheyt helpen brengen, soude oock den Grave van Thurn ende den Heere van Hof Kercken als ooc den Redeiferens gevangen ghekregen hebben, Soo houden de Grave Emerico ende Stenzel Thurso ooc aen om Pardoen, heeft oock den Broeder van Gabriel Bathon, (dewelcke Betlehem hier voren, daer door hy totte Regeringhe ghecomen is, heeft doodt slaen laten) dewelcke sich zedert in Polen opghehouden heeft, 3000. man te samen ghebrocht, wil sich daer met by den Setschi voeghen, ende zijn gheluck aen Sevenberghen versoecken.
Dese daghen is een voor-treffelijcke Moravisch Heer Dedinski ghenaemt, alhier ghevanghen ghebrocht, ende int Keysers Spitael ingheset.
Die Gheunieerde Ofghesanten, hebben eenen eyghen Currier mette Keyserlicke Resolutie int Rijck gheexpedieert, ende hooptmen dat alles int Rijck wederom tot eene gherusten Stadt sal ghebrocht worden.
Die Marckgraef van Jaghers-Dorp heeft oock die Stadt Nies in Slesien met practiquen inghenomen, mochte wel over sulcx dat het accoort t’welck Chur-Saxen mette selvighe Standen ghemaeckt heeft, wel gheheel ghecasseert worden.
VVt Zuyrich den 18. April. 1621.
Wt Bundten comt tijdinghe, dat, naedien die Ghesanten uyt Bundten verreyst zijn, die 5. Plaetsen wederom eenen inval in Ruste ghedaen, ende veel volcks gheslaghen hebben, men seyt van 700. man, zijn meestendeel Catholijcken, hebben oock dry Bundtnaers ghevanghen ghenomen, diewelcke van de drie Bundten tot dit volck zijn ghesonden gheweest, soo sijn oock de Ghesanten vande 4. Steden heen of ghereyst.
Die Fransche Ambassadeur dewelcke in Bundten is gheweest, is oock gisteren alhier ghecomen, heeft in plaets van 9000. Croonen maer 7000. florijnen ghebrocht ende is alsoo ghebreck aen ghelt.
Die 5. plaetsen hebben de byeencomste die tot Baden aenghestelt is, of gheslaghen, segghen dat sy sich die Bundtnaers niet meer willen aennemen, want sy opentlijcke vyanden teghens haer zijn.
Huyden heeftmen alhier in haeste den Raedt te samen gheroepen, die ghemeente is seer qualijck te vreden datmen soo langhe toesiet.
VVt Greſlits in Bohemen.
Dat Beyersche volck heeft nu acht daghen lang met elf Vaendel te voete ende ses Cornette Peerden voor Elleboghen gheleghen, ende die Saxsche noch om Falckenou ende die quartieren opte Dorpen omheer, die Beyersche schieten dapperlick met groote Stucken op haer, die van binnen doen insgelijcx ende houden sich Ridderlicken, ende hoortmen het schieten over vier mijlen weeghs, Die Beyersche hebben dat Kerckjen buyten voor de Stadt inghenomen, waer over die Elleboghers uytghevallen zijn, hebben dat Kerckjen wederom verovert, ende dat Beyersche volck dat daer inne lach alle doot gheslaghen, voorts het Kerckjen gheheel totten grondt toe afghescheurt, ende hoortmen van de Beyerschen alreede inde vijf hondert Man, als mede de Overste vande Artellerije daer vooren ghebleven zijn, Die van binnen hebben voor twee daghen eenen Tromslagher uyt totte Beyersche ghesonden, ende aensegghen laten, eer zy sich aen de Beyersche begheeren over te gheven, willen zy sich tot opten laetsten Man weeren, dan soo het Chur-Saxsche volck daer voor ruckt, mochten zy wel accorderen, uyt wat oorsaecken ofte waeromme dat Saxsche volck niet daer voor treckt, weetmen niet.
Int Beyersche Legher heeftmen veertich Mantsve[l]tsche Ruyters ghevanghen ghecregen, by de welcke men brieven inde Leersen ghevonden heeft, daer inne vermelt wort, zy souden sich maer vier daghen houden, soo wilde hy hun met sulcken secours te hulpe comen, dat zy sien ende segghen souden hy hebbe sijne be[l]often volbrocht, wert alsoo die gantse Ellebogher Creyts bedorven ende verheert, gelijck van ettelijcke hondert Boeren in de Bosschagien ghevlucht zijn, ende bevreestmen sich, zy mochten sich te samen voeghen ende rebelleeren, want zy alreede met smoocken ende branden drouwen.
Als die Falckenouwers dit vernomen hebben, hadden sy groot berou, dat sy sich oock niet tot opten laesten man hadden ghehouden, want aldaer niet eene vande Burgers verschoont wort, alle Coperen potten, ketels, schuttels, ende alles wert hun genomen, hebben oock sedert niet gebacken noch yet derven doen laten, als sijnde van hare privilegien berooft.
Dese dagen is wederom een vaendel Soldaten onder den Capiteyn Leyser, ghenaemt die Geelrocken, Frauwenrut ende Neudec aengecomen, dewelcke sich voor Boutsen seer wel ghehouden hebben, by de welcke desen middach een rijdende Currier vanden Ghenerael uyt Egher aenghecomen is, met bevel morgen sonder vertreck naer Egher te comen, want de Grave van Mansvelt in stercken aentocht is, daer over sy sich seer bevresen, sijnde inde 10000. sterck ontrent Waltsaxen ende maer ontrent een halve mijle van Egher aenghecomen.
VVt Egher den 21. dito.
Alhier sal wederom Sax volck van Falckenou ende die quartieren als oock van andere plaetsen aencomen, dewijle men sich seer bevreest voor de Grave van Mansvelt, die alrede opte Frontieren leyt, ende hoort men uyt Falckenou tot hier toe schieten, soude oock alreede veel Beyersch volck ghebleven zijn.
VVt den Palts den 27. dito.
In plaets van Marquis Spinola sal Don di Cordoua het opperste ghebiet inden Pals behouden, Tot Heydelbergh ende Franckendael wercktmen seer aen
