was zoe hebbe ich zeer onbedachtelijck gedaen al wat ſy begeerde/ende ſoe haeſt ick mynen wille hadde volbracht ſoe be[n] ick gewaer geworden dat ſulcx niet natuerlijcken en was/ende en hebbe tzedert my niet connen onthouden/ ſondighende alſoe inder Toouerije in veelderleye booſheyt verſteent/naer welcke bekenteniſſe heeft men hem naer af neminghe synre Sacrificien gelijc den anderen Toouenaers verbrandt.
Noch in een dorp niet verre van Trier gelegen / heeftmen veelderley wijnen/ in grooten ghetale/ rijck ende arm/Jonck ende oudt/verbrandt / midtſdien zy ſeer byder Moſel in een clooſter S. Marimin ghenaempt tzedert den eerſten dach Mey groot Jammer ende verdriet vuit rechten wilden/ende het coren/en[de] den wyn bedoruen ſouden hebben/ dwelck god niet gehingen en wilde /maer heeft dit int licht laten comen/ men vant een wyf inden wyngaert die van gelijcke[n] feyt was als de voergaende/die welcke gevangen gebracht/en[de] opentlijcken bekent hebbende dat ſy daer mede menigen vromen man (ſoe haer geraden was) bedruct hadde/is metten andere[n] verbrandt geweeſt.
Daer heeft oock eenen Toouenaer ghewont tot Bepper dry mylen van Ceulen/de welcke de toouerije gedreuen had de xxiiij. Jaere[n] lanck/ende conde hem ſeluen veranderen in eenen weir wolf/hy worde gevangen ende gepijnicht/ ende bekende dat hy derthien cleyn kinderen van ſeſſen oft zeuen iaren omgebracht hadde/met noch twee mans en[de] een vrouwe gedoot/oock zeuen Jaeren met zyne dochter geboeleert/ welcken men tot poluer verbrandt heeft/hy hadde noch meer andere booſe feyten bedreuen/naer luydt zynder bekenteniſſe/men heeft hem den xxxi. October tot Bepper geiuſticieert/ ende eerſt thienmael met gloeyende tangen genepen en[de] ghepitſt/ende daer naer met een byl oft aecxt armen ende beenen ontvoer geſlaghen ende alſoe geraeybraect ende ten leſte[n] heeft men hem thooft afgeslagen tlichaem verbrandt eenen houten wolf gemaeckt ende dien geſtelt op een radt ende thooft daer op genagelt/ alſoe is deſen wolf geloont.
DAerom laet ons God den heere dach ende nacht bidden dat hy der Ouerheyt ſin ende moet gheue om alle
Pagina:Warachtighe Ende verschrickelijcke beschrijuinge van vele Toouenaers ende Toouenersse oft vandoysen hoe ende waerom men die herwaerts ende ghentswaerts verbrandt heeft in dit teghenwoordich Jaer 1589.pdf/9
Deze pagina is proefgelezen
