BEminde Leſer Ic en can niet vertellen noch vuyt ſpreken alle de duyuelrije die ſy bedreghen ende bekent hebben, zo int Cheur vorſtendom van Trier, als aen de Moſel zijn de Toovenaers ende Toovenerſſen verbrant in getale wel van dryhondert ende vyftich, onder de welcke was eenen vande vernaemtſte Raedtſheeren van Cheur vorſt van Trier, een grootmachtich ende rijck man, genaempt Flade, doctoor inde rechten, de welcke wordde beticht van Tooverije, ende ghevanckelijcken gehouden inde zeſſe maenden als voer ſulcx bekent, ende alſoemen hem daer vore wilde bedinghen heeft hy hem willen verantworden ende geſeght dattet alleenlijcken was magia (int duytſch ſwertte conſte) ende datmen daer by niet verstaen en can noch achten te zyne ſtraffelijcke Tooverije aengeſien dattet natuerlijck is ende niet duyuelijck, oft afgoderije begheerende ouer ſulcx ontſlaghen te worden van hachten, deen hielde hem voer eenen Raetgheuer ende dander voer eenen Tooveraer,immers is den zelven Flade opten xxvi. May. als eenen Tooveraer van Levenden lyve ter doot ghedoempt ende geexecuteert.
Men ſeght oock van eenen Pastoor dat dien soude Toovenaer gheweeſt zijn naer dien hy oock ghevanghen genomen is ende men hem gevraecht heeft waer hy ſulcx geleert ende hoe lange hy die gebruyct heeft heeft geantwoort, dit hebbe ic een wyle aenghenomen ſoe ick teghen den avont uuyt Trier naer myne dorp genaemt Pfare ben gegaen ende ben onder weghen blyven ſlapen by eender hecken tot ſmorgens, ende wandt ick nu opſtonde hebbe ick opten wech nemen my ghesien een ſchoone Jouffrouwe met ſchoone cleederen gecleedt de ſelve tot my geroepen, als nu Sathan in sulcke gedaente by my quam ſoe heb ick haer van boelschap aengheſproken welcke ſy met eenen lachende monde niet en weygerde, waerom ick al noch inſiſteerde, ende heeft my wederom geantwoort wildy hebben dat ick uwen wille pleghe ſoe ſuldy doen tgene ick begeere ende want ick terſtont iae ſeyde, ſoe ſeyde zy ſoe ſult ghy Chriſtum midtſgaders ſyne lieve moeder verloochenen, ende u ſelven in myne gewelt gheven, ende ick sal u oock ſchoone conſten Leeren, ende ter wylen ick nu zeer begeerlijcke
