BEminde Leſer Ic en can niet vertellen noch vuyt ſspreke[n] alle de duyuelrije die ſy bedreghen ende bekent hebben/ zo int Cheur vorſtendom van Trier/ als aen de Moſel zijn de Toouenaers ende Toouenerſſen verbrant in getale wel van dryhondert ende vyftich/onder de welcke was eenen vande vernaemtſte Raedtſheeren van Cheurvorſt van Trier/ een grootmachtich ende rijck man/genaempt Flade/doctoor inde rechten/de welcke wordde beticht van Toouerije/ende ghevanckelijcken gehouden inde zelle maenden als voer ſulcx bekent/ende alſoemen hem daer voer wilde bedinghen heeft hy hem willen verantworden ende geſeght dattet alleenlijcken was magia (int duytſch ſwertte conſte) ende datmen daer by niet verſtaen en can noch achten te zyne ſtraffelijcke Toouerije aengeſien dattet natuerlijck is ende niet duyuelijck/oft afgoderij begheeren[de] ouer ſulcx ontſlaghen te worden van hachten/ deen hielde hem voer eenen Raetgheuer en[de] dander voer eenen Toouenaer/immers is den zeluen Flade opten xxvi. May. als eenen Toouenaer van Leuenden lyue ter doot ghedoempt ende geexecuteert.
Men ſeght oock van eenen Paſtoor dat dien ſoude Toouenaer gheweeſt zijn naer dien hy oock ghevanghen genomen is ende men hem geuraecht heeft waer hy ſulcx geleert ende hoe lange hy die gebruyct heeft heeft geantwoort/dit hebbe ic een wyle aenghenomen ſoe ick teghen den auont vuyt Trier naer myne dorp genaemt Pfare ben gegaen ende den onder wegghen blyuen ſlapen by eender hecken tot ſmorgens/ende wandt ich nv opſtonde hebbe ick opten wech nemen my gheſien een ſchoone Jouffrouwe met ſchoone cleederen gecleedt de ſelue tot my geroepen/als nv Sathan in ſulcke gedaente by my quam ſoe heb ick haer van boelſchap aengheſproken welcke ſy met eene[n] lachende monde niet en weygerde/waerom ick al noch inſiſteerde/en[de] heeft my wederom geantwoort wildy hebben dat ick uwen wille pleghe ſoe ſuldy doen tgene ick begeere ende want ick terſtond iae ſeyde/ſoe ſeyde zy ſoe ſult ghy Christum midtſgaders ſyne lieue moeder verloochenen/ende v ſelu[n] in myne gewelt gheuen/ende ick ſal v oock ſchoone conſten Leeren/en[de] ter wylen ick nv zeer begeerlijcke
