ende vee heel ſchadelijck was, want ſy daer mede by daghe oft nachte beſtreken worddende, zijn vol groote gheſwillen lam ende blindt ghewordden ende en hebben een gheſonde ure aen eenich van hennen leden niet behouden, dwelcke nu al kennelijcken ghewordden zijnde, ende waer zy die potten begraven hadden, heeftmen tot eenen litteecken die zelve potten ende zalven ontgraven ende tſamen met die wyffs, die hennen rechten loon creghen, tot pulfer verbrandt.
EErſtmaels heeftmen twelf statelijcke ende rijcke vrouwen, diemen zulcx niet toe en betroude, met eenen jonghen geſelle diet van zijnder moeder gheleert hadde, alle tſamen aen eenen ſtaeck verbrandt.
Tot Merghendale weſende een stedeken, wordde oock een oudt wyf ghevanghen, die vrijlijcken bekende dat zy metten duyvel boven opten schoreſteen oft ſchouwe geboeleert hadde, ende dat zy ſulcken tooverije bedreuen hadde eenenveertich jaeren lanck, ende binnen dien tijt tachentich kinderen om tleven ghebracht hadde, ende volgende des duyvels raedt vele jonge ende oude lieden den meeſtendeel ontrent het hoochtijt met fenijn vergheven hadde, oock tusschen vrome lieden tweedracht berockt, het coren, den wijn, ende andere vruchten int gemeyn, ſo vele haer mogelijc was verdorven, ſeggende voorts datter geen vroey vrouwen ontrent Mergendale in thien mylen int ronde en waeren te vinden, dan dattet al toovernerſſen waren, ende beroemde haer, ſprekende al lachende, dat ſo verre daer ſo vele mans int lant waeren die tooveren conſten als vrouwen, zy die alle gelijck drijven woude int weren wout, midts welcken vercleren men haer met gloeyende tanghen gepitſt ende ghenepen heeft, ende de rechte hant af ghehouwen ende eyntelijcken metten viere tot polfer verbrandt.
Tot Walterstadt in Swaven, een half myle van Norlinghen, heeft de grave aldaer acht toovernarſſen gecreghen, die welcke hy oock met geloeyende tangen heeft doen nijpen ende de rechte handt afgehouwen ende voorts doen verbranden, welcke bekenden dat zy onder andere duyvelrijen die zy bedreven, over de hondert ende veertich kinderen om het leven ghebracht hadden.
