Tijdinghe uyt verscheyde Quartieren/1621/15 maart/Wt Prage den 25. dito
| ‘Wt Prage den 25. dito. [= 25 februari 1621]’ door een anonieme schrijver |
| Afkomstig uit [Tijdinghe uyt verscheyde Quartieren], [maandag] 15 maart 1621, [p. 1]. Publiek domein. |
Wt Prage den 25. dito.
Voorleden Saterdach heeft de Vorst van Lichtensteyn op Keyserlijcke bevel 7. Heeren ende Ridderlijcke persoonen, Item 21. vande Burghers ende den Raet, uyt alle drie Pragher-Steden, dewelcke sich meest alle voor desen by die Directie hebben gebruycken laten, in verseeckeringe laten nemen, Die Heeren ende Ridderlijcke persoonen heeftmen achter de Slot-kercke, daer het Burghgraven ampt ghehouden wort, die anderen opte Raedthuysen 3. 4. ende 5. by malcanderen in bewaringhe gheset, soo men verneemt, sullen die Heeren ende voornaemsten nae dese weecke op ettelijcke Conincklijcke Sloten als Birlits, Glaats ende dierghelijcke plaetsen, tot hare Keyserlijcke Majesteyts aenkomst, ghevoert ende bewaert worden.
Die jonghst ghemelde stucken diewelcke den Vorst van Beyeren alhier vanden Chur-Vorst Palts verovert heeft, ende voor eenighe daghen van hier wech ghevoert ende met 300. man gheconvoyeert zijn, sijn niet alleene tot Glata ghebrocht, maer oock den selven dach met ander volc dat van Munchem het gelt voor die Beyersche Soldaten ende over 500. duysent florijnen was, hadden gheconvoyeert, voorts nae Munchem ghevoert, die anderen zijn wederom te rugh mettet ghelt eergisteren avont alhier aenghecomen, alsoo dat niet volgt, gelijckmen voor desen uytgegeven heeft, dattet Mansveldtsche volck het Convoy gheslaghen ende de buyt ghecreghen souden hebben.
Van die Capiteynen ende Officieren verneemtmen, dat die Grave van Mansvelt ende met hem de Grave Albin van Slijck, sich nae de Palts souden begheven hebben om meer volck aen te nemen, dewijle hy sich niet over 3000. man sterck bevindt, waer teghens dat Beyersche volck sterck op hun aendringt ende sichseer stercken, ghelijck dan oock aen die plaetsen die Keur Saxsche hulpe aenghecomen is, ende Pilsen ende anderen plaetsen omcinghelt hebben.
Dese daghen hebben sich die ghedeputeerde Commissarissen van hier int Coninckrijck Bohemen begeven, om t’volck opt landt te ontwapenen.
Hertogh Maximiliaen in Beyeren heeft (naedien den Acht tegens de Churv. Palts tot Weenen is gepubliceert geweest) aen de Over Palts geschreven, ende aen hun begheert sich te verclaren of sy sich by sulcken beschapen saken in sijne bescherminghe begheerden te gheven, souden daer op geantwoort hebben, sy hadden een mael haren Heere gheswooren, den welcken sy met plicht ende Eedt verbonden waren, verhoopten dat deselve haer wel soude beschermen.
Vande Honghersche tractatie ist gheheel stil, niet teghenstaende dese daghen verscheyden schrijven van Weenen alhier aenghecomen zijn, ende gants niet daer van vermelden.