Tijdinghe uyt verscheyde Quartieren/1621/15 maart/Wt Weenen den 24. Februarij

‘Wt Weenen den 24. Februarij’ door een anonieme schrijver

Afkomstig uit [Tijdinghe uyt verscheyde Quartieren], [maandag] 15 maart 1621, [p. 1]. Publiek domein.

[ 1 ]

Wt Weenen den 24. Februarij.

Van weghen die Honghersche tractatie, is die stilstant met hen op 12. daghen gheprolongeert, doch gelt maer alleene aen dese zijde tot op Presburgh ende Turna, aen d’ander zijde streupen sy daghelijcks, ende voeren die luyden ghevancklijck wech, hebben oock den Merck Wolckersdorp gheplondert ende afghebrandt, waer over men inde 3000. man te peerde ende te voete heen over ghesonden heeft, t’selve te keeren, dewelcke die Hongaren (overmits het ys haest breken mochte) niet hebben verwacht, maer sich weder heen over tot den Wittenbergh ghesalveert.
Die 600. Cosacquen die verleden weke haren aftoch van hier nae Polen hebben ghenomen, sijn inder nacht over de Donau ghevoert, alsoo dat die Hongaren dewelcke op hun hadden ghewacht deselve niet hebben aenghetroffen, dan andere melden dat sy daer nae tusschen die Moravische ende Poolsche Frontieren van de Hongaren meest alle zijn gheslaghen, behalven eenige weynich diet ontloopen zijn, hebbende eene groote buyte van hun becomen.
Soo comt oock tijdinghe dat de Budiani sich met den Hongaren ghesterckt ende tot Beckenveldt den Colaldo in zijn quartier overvallen, alle zijn volck neder ghehouwen, sulcks dat Colaldo sich selfs nauwelijck heeft ghesalveert.
Teghenwoordich wil men segghen dat die vredens tractatie mette Hongaren soo wijt becomen is, dat het nu alleen maer staet op Keyserlijcke Majesteyts generael pardoen, die resterende poincten waren meest alle gheaccordeert.
Bucquoys volck light noch mettet Winterleger aen de Marck ende verwacht aldaer ghelt ende ordonnantie, men seght dat Bucquoy selfs wil resigneren.
Hare Keyserlijcke Majesteyt hebben sich metten Hertogh in Beyeren door desselfs Heeren Ofgesanten sulcx vergheleecken, dat hare Vorstelijcke Doorluchticheyt van weghen hare alreede aenghewende Crijchs oncosten, die sich op twee ende twintich Tonnen Gouts bedraghen het Landt over der Ens pants-wijse sal inhouden, tot dat ander contentement volght, ofte die Chur-Palts, wanneer de selvevan Spinola inghenomen is, daer voor gheven, twelck die Over-Ensersche Standen vreemt voorcomt, ende wel allerley veranderinghe gheven mochte.
Tot Brin ende aen ettelijcke andere plaetsen in Moravien, heeft men die Evangelischen alreede die Kercken ghesloten, ende die Predicanten wech gheschaft, desghelijcx is in dit Landt in’t Stedeken Horn oock geschiet, ende mochten wel corts, soo wanneer het maer mette Hongaren claer is, meerder reformatie volghen, Soo is oock van’t Hof een Decreet uytghegaen ende ernstich bevolen, gheen ander als de Catholijcksche Religie toegedaen zijnde, in dienst ende officien te nemen.