Tijdinghe uyt verscheyde Quartieren/1621/21 april/VVt Egher den 6. April
| ‘VVt Egher den 6. April’ door een anonieme schrijver |
| Afkomstig uit [Tijdinghe uyt verscheyde Quartieren], [woensdag] 21 april 1621, [p. 1]. Publiek domein. |
VVt Egher den 6. April.
Huyden is die Chur-Saxen Overste met 3. Stucken gheschuts van hier, daer onder een groot Stuck gheschut is, met eene Compaignie Ruyter ende een Vaendel Musquettiers met Schans-Corven ende andere Crijchssaecken, daer toe ettelijcke hondert Beyersche Crijchsvock comen sullen, na Falckenou ende Elenboghen ghetrocken om ’tselve te belegheren, ende soo men seyt, souden sich huyden vroech die Falckenouwers met Vrou ende kinderen na Ellebogen ghesalveert, ende dat Stedeken inde brandt ghesteecken hebben, Soo heeft men oock voor seecker advijs dat die besettinghe in Pilsen mette Beyersche geaccordeert is, ende teghens betalinghe, de selve Sterckte overghegheven hebben, vier Vaendel sijn by de Beyersche in Pilsen ghebleven, die andere drie Vaendel de welcke int accoordt niet hebben consenteren willen, zijn nae Mansvelt ghetrocken, hebben perdoen ghecreghen, overmits zy inde overghevinge onschuldich zijn, hebben daerinne tweentwintich groote ende cleyne Stucken gheschuts gelaten, Soo verstaetmen tegenwoordich dat sich Tabor ende Wittingou, oock met accoort soude overgegeven hebben, soot selve waer is, mochtet Ellenboghen wel niet lang teghenhouden. Die Grave van Mansvelt treckt dagelijcx noch veel volcx toe, wat hy daer met voornemen wert, sal den tijdt gheven.