Nieuwe Tijdinghen/1620/17 juli (2)
| ← 17 juli 1620 [1] | Uerclaeringhe van het ghene nv onlanckx in Italien is ghepasseert
[Nieuwe Tijdinghen], Boekje Pp, [vrijdag] 17 juli 1620 |
21 juli 1620 [2] → |
Uerclaeringhe van het
ghene nv onlanckx in Italien is ghepasseert.
Overghesedt wt de Hooch-Duytsche sprake in onse Nederlantsche Tale.
Eerst Ghedrucky den xvij. Julij.
_p_1_illustration.jpg)
T’Hantwerpen, By Abraham Verhoeuen, op de Lombaerde veste, in de gulde Sonne. 1620.
Met Gratie ende Privilegie.P p.
wt Roomen.
Vanden xxvj. Junij. 1620.
VAn Napels is adviso, als dat den Duca Dossuna op den xiiij. Junij met de Galleyen naer Spagnien af ghevaren is, ende zijne Huysvrouwe die niet mede en wilde vertrecken, is noch daer ghebleven, ende daer waeren noch seven duysent Soldaten ghereet, de welcke naer Vado gevoert souden worden tot secours van den Keyser.
Den nieuwen Vice Roy heeft eenen nieuwen Gouverneur aen de oude Stadt Brindisi ghesonden, om de selve plaetse te versekeren.
Wt Venetien den xxvj. Junij 1620.
Van Marsilia in Provenzen verstaetmen als dat die Turcken van Tunes hebben ontboden, ende [ 4 ]gheschreven aen die Magistraet van Marsilien, al ist saecke dat den Turck sonder haeren weten vele Christenen ende Fransoysen heeft ghedoot, door het mis-verstandt datter in Marsilien ende Constantinopelen aen de Ambassadeurs is gheschiet, datse begheeren met de Marsilianen, de Commerce ende Coopmanschappen te drijven, ende vrientschappe willen houden, ende die van Tunes hebben bevolen aen allen haere Schepen ende See-roovers, de Fransoysche Schepen onghemolesteert te laten, ende gheen hinder te doen, ende al ist datse wt Spagnien comen, datse maer de goederen en sullen besien, ende de schepen laten varen ende passeren.
Die Ridders van Malta met haere Galleyen, ende de Galleyen van den grooten Hertoch van Florensen hebben wt gheweest, ende hebben een rijcke Marce berooft, daer de Turcken ende Joden quamen handelen, ghenaempt Tornese, al waer datse eenen grooten buet van Sijde ende andere Coopmanschappen hebben ghekreghen ende gheplundert, ende hebben over de vier hondert Turcken ende Joden gevangen ghekreghen, ende alles tot Slaven op de Galleyen gheketent, ende onder weghen hebbense een groot schip inde See ghevonden, vande Turcken, het welcke met Christenen gheladen was, waer mede datse wilden een vestinghe gaen doen graven aen een [ 5 ]stadt, de Galleyen hebben het Turcx schip vermeestert, ende allen de Christenen verlost, ende de Turcken vast gheboeyt.
Van Constantinopelen schrijftmen als dat den Turck begheert van de Venetianen restitutie gedaen van allen de schaden die hy gheleden heefdt van de Spaensche Armade, ende datse sullen betalen ses hondert duysent Cecchini, oft datse die Insule Tine in Archipelago, die Stadt Spalato, ende andere Quartieren sullen ruineren, ende sonderlinckx den residerende Venedischen Bailo aldaer residerende sullen dooden, waer over den Illustrissimo Guistiniano, nieuwen Bailo niet voort trecken en wilt, ende houdt hem noch tot Corfu, tot dat de onrust met den Turck wat ghestilt is.
Wt Duytslant van Nieuwsol 1620.
Den 13. Junij zijn die Boheemsche, ende den 15. de over Oostenrijcxsche die van Moravien, Slesien, ende andere gheconfedereerde landen Ghesanten al hier comen, de welcke van weghen Bethlem Gabor ende Honghersche Standen grootelijckx zijn ontfanghen, Die Hunghersche houden daeghelijckx grooten staet als oock Emerich Turso ende Rachozi George.
Heden is den Poolschen Ambassadeur van Constantinopelen comen, ende de Hongersche noch niet, [ 6 ]ende die van Bethlem Gabor met zijn huys-ghesin is hem teghen ghereden.
Den Turckschen Ambassadeur is den xij. Junij naer Praghe van hier ghereyst, de welcke men verstaet, soude Patenten hebben van den Turck, als dat hy met de gheconfedereerde Landen eenen eeuwighen vrede soude gesloten hebben, ende haer nimmermeer en soude misdoen oft aen tasten.
Interim soo is des Bethlehem Gabors Krijchs-volck op de omligghende Spanschafften oft Frontieren gheleyt, ende daer wort scherpe ordre gehouden datse niemant en souden misdoen. Den xxij. Junij, soo heeft den Landtdach hier zijn beghinsel watter ghesloten sal worden wilt den tijt leeren.
Wt Weenen van xxiiij. Junij.
Den Heer van Leyninghen is wederom hier gecomen, den Bethlehem Gabor en begheert gheen Ostagiers, ende daer is verclaert met de Hungersche ende allen het Lant door, gheduerende desen Lantdach, een yeghelijck vry ende vranck te mogen passeren, ende repasseren, ende te coopmanschappen met den anderen, waer over de Keyserlijcke Majesteyt den Heer George Teufel, den Heer van Leyningen samen met eenen Secretarius na Nieuwensol heeft ghesonden, ende soo haer den Lantdach wel aen staet sal den Heer van Lichtensteyn volghen. Men ver[ 7 ]staet hier voorseker als dat de gheconfedereerde Rebellen ende den Turck samen eenen eeuwigen vrede ghesloten hebben, ende den xx. deses zijn die Moravische Soldaten tot Vlrichs Kirchen ghecomen, ende hebben daer allen de beesten ghenomen.
Den xxiij. deses is hier ghepubliceert, daer in bevolen is, dat allen de ghene die hier om de Stadt dry hondert schreden lanck eenighe stercke Speelhuysen, Hovens, oft Kelders hebben, datse de selve binnen dry weken sullen afbreken, met conditie dat zijne Keyserlijcke Majesteyt haerlieder andere plaetsen sal verleenen, ende elcke naer zijn qualiteyt, sal betalen, ende doen bouwen op andere plaetsen, ende t’ghene van houdt is, oft houte huysen, oft schutsels sal moghen blijven staen, oft sake ware dattet noot soude wesen, sal gheslist worden oft afghebroken.
Ende hier wort de stadt van den Rothen thoren af tot aen der Thonauw met Aerde ende Rijs sterck hermaeckt, ende by der Slach-brugghen wort een Bolwerck oft hooghe kat op gheworpen.
Den xxiij. Junij soo hebben de Keyserlijcke Majesteyt voor het leste de N. Oostenrijcksche standen, alles ontboden ende bevolen, den vj. Julij te compareren op de Huldinghe pro peremptorio et omni termino beschreven, oftse wilden commen oft niet, wantmen al even wel met de huldinghe sal voorts [ 8 ]varen, ende de ghene die achter blijven, ende niet en willen compareren, datmense sal houden ende verclaeren voor onghehoorsame Rebellen, ende perturbateurs des Keyserrijcx, daer over en isser van de Standen tot Rats, noch niemant vande ghesanten wederom comen.
Men heeft een yeghelijck gheinsinueert, ende die vereeninghe in acht te nemen, ende te waerschouwen, wat datter naer sal volghen, oft sake waere datter eenigh ongheluck af quame, datse het niemant en sullen wijten, ende ofter eenighe goede ghetrouwe ondersaten waeren, die eenigh verlies door de quade mochten lijden, datmense sal beschermen ende voorstaen, ende by ongheval eenighe goederen verloren, datmense Heerlijck ende Rijckelijck alles sal restitueren, ende recompenseren.
Wt den Legher en is hier niet bysonders, dan dat ons volck haer seer, hoe langher hoe meer beschantsen tot Heytersdorff, ende veel Hovens, Wijngaerden ende Huysen bedorven worden.