maer malcander cruyſen, als van ſchele menſchen die daerom twee voor een ſien. Inder voughen dat dit woort comt uyt kennis der omſtandighen vant gheſicht, als uyt cruyſing of ſprieting der ſichtſtralen.
Om nu te ſegghen vant woort anſchauwen, het is te weten dat wy gheen weſentlicke ſaeck ſelf en ſien, maer alleenlick ſijn ſchaeu, gelijck daer af breeder gheſeyt ſal worden onder d’ eerſte begheerte vant 1 bouck der volghende verſchaeuwing: Sulcx dat al t’ ghene wy ſien niet dan ſchaeuwen weſende, en vervolgens het anſien oock een anſchaeuwen, ſo hebben de Duytſchen daer af het woort Anſchauwen ghemaeckt, om dat benevens t’ woort Anſien te meughen ghebruycken. T’welck ghetuychnis gheeft dat ſoodanighe eyghenſchap der ſchaeuwen by hun bekent was.
In ſomma een die t’weſen der Duytſche tael met verſtant inſiet, heeft oirſaeck om daer af ſo ſeer te verwonderen, als vande teyckens inde 6 bepaling des Wyſentijts beſchreven. Want onder een [1] gheſlacht van volck, gevonden te worden ſoo veel verſtandighe menſchen, die weten wat eenſilbicheyt: vermach,
- ↑ Gentem.
