5
de zijne verloren eenighe mannen, ende daer teghen van den vyant ouer de 30. doot gheslaghen. Sijn peert viel ende den Toom was desghelijcken gebroken. Sijn Cornette verloren zijnde is weder ghenomen van een van de onse die den anderen gedoodt heeft ende is met de selue int quartier comen. Waer ouer den Marquis prijsende de vromicheyt van dien Ruyter heeft hem ouer de hondert Philippen gheschoncken, ende de eerste vacante Cornette belooft.
Hier was tijdinghe gecomen den 22. dat den seluen Prince d’Espinoy ghelaxeert soude zijn, ende dat de Oude Pals-Gravinne is gevlucht wt Heydelberch naer Straes-borch om dat het daer ontrendt wat te heet beghint te worden.
Den Marquis Spinola doet by Oppenheym een gheweldich Fort Royael maecken, aen t’gheberchte d’welcke men extimeert Imprenabel te wesen.
De Protestanten hebben Garnisoen in Heydelberch gheleyt. Den Marquis Spinola heeft ouer de nieuwe Brugghe by Oppenheym veel Ruyters doen passeren, met ettelijcke duysent voetknechten, ende soo ghemarcheert naer de Bergh-strate, al oft hy zijnen wech naer Heydelberch wilde nemen, maer waer op dat ghedijen sal is noch onbekent, de vreese is hier int Palts-Grauen Landt seer onder t’volck t’Gheboerte, Jonckers, Borghers, Cooplieden,
